လူသိနည်းနည်း အင်တာဗျူး

တိုက်ပိုင်ရှင်ကြီးက ကြိမ်လုံးကိုင်ပြီးမေးတယ်
မင်း ငါ့သားကိုလွမ်းရဲသေးသလားတဲ့
အိမ်ဖော်မလေးက ဖြေတယ်
ကျွန်မ မလွမ်းရဲပါဘူး ဘဘကြီးတဲ့
ဒါပေမယ့် ကဗျာဆရာငါက အသေအချာပြောဝံ့ပါတယ်ကွယ်
အိမ်ဖော်မလေးရဲ့ရင်ထဲမှာ
အဲဒီကောင် အမြဲရှိနေလိမ့်မယ်။ ။

နေမျိုး
၅-၁၀-၀၅

ထိုသုံးဦး

တရားကိုသိသူက
စာအုပ်တစ်အုပ်ကိုဖတ်တယ်
အားကိုသိသူက
ဓားတစ်လက်ကိုသွေးတယ်
ဘာမျှမသိသူက
လမ်းပေါ်လေချွန်ပြီး လျှောက်နေလေရဲ့။

နေမျိုး
၂၃-၁၂-၀၂

စာရေးသူ

ကောင်းကောင်းအသက်ရှူမယ်
စကားကောင်းကောင်းပြောမယ်
အစားကောင်းကောင်းစားမယ်
ကောင်းကောင်းနေမယ်
ကောင်းကောင်းနိုးထမယ်
ကောင်းကောင်းအလုပ်လုပ်မယ်
ငါတို့ဖတ်ရှုခဲ့ရသော ဆိုးတဲ့ပုံပြင်များ
ကောင်းကောင်းအသစ်ပြင်ရေးမယ်ကွယ်။ ။

နေမျိုး
၃၁-၁-၀၅

ဆင်ဖိုနီနံပါတ်(၄၃)

ဗလာစာအုပ်တစ်အုပ်ဟာ
ကျုပ်အကြောင်းရေးထားတာပါဗျာ
ခရုခွံကလေးတစ်ခုကတော့
ကျုပ်ဝယ်ထားတဲ့နိုင်ငံငယ်လေးတစ်ခုပေါ့
အားကုန်နေတဲ့ဓာတ်ခဲက
ကျုပ်ကိုပုံတူထုထားတာဆိုပဲဗျ
ပိုက်ဆံနည်းနည်းလောက်ချေးပါ
အဲဒါကျုပ်ပြဇာတ်ကတုန်းကပါ
ရော့ဒါတွေမင်းယူလိုက်တော့
အဲဒါကျုပ်စစ်စစ်ပေါ့။ ။

နေမျိုး
၁၄-၅-၀၅

ကန္တာရသားတို့ရဲ့ ဝေါဟာရ

လေနီကြမ်း၊ သဲမုန်တိုင်း၊ တံလျှပ်
ဆူးကြမ်းပင်၊ ပူးပြင်းခြောက်သွေ့မှု
ဘယ်ဆီဘယ်ဝယ်၊ ရေဘူး၊ သစ်သီးခြောက်
ကုလားအုပ်၊ အော်သံ၊ တိတ်ဆိတ်မှု
မျက်စိလည်ခြင်း၊ ဟိုးအဝေး၊ မျက်စိတစ်ဆုံး
ဟင်းလင်းပြင်၊ လမ်းပြကြယ်များ
တရွေ့ရွေ့ဖြတ်သန်းခြင်း။ ။

နေမျိုး
၆-၁၀-၀၅

မီးရထားများ

မီးရထားများ တစ်စင်းပြီးတစ်စင်း
ခုတ်မောင်းကာ ဘူတာရုံထဲဝင်လာ
ဘူတာရုံထဲမှာ
ဧရာမမီးရထားကြီး
ခုတ်မောင်းဝင်ရောက်လာတဲ့မီးရထားများကို
တင်ဆောင်ပြီး
ဂျုံးဂျုံးဂျက်ဂျက်
ခုတ်မောင်းထွက်သွား
ပို၍ကြီးမားသော မဟာဧရာမမီးရထားကြီးဆီသို့။ ။

နေမျိုး
၁၂-၆-၀၅

မရှိမဖြစ်လိုအပ်သော အရာဝတ္ထုများ (အဘိုးကြီးတစ်ယောက်အတွက်)

၁။ တုတ်ကောက်တစ်ချောင်း(အမြဲတမ်းအတွက်)
၂။ သွားတုတစ်ခု
၃။ စိပ်ပုတီး(တစ်ခါတစ်ရံအတွက်)
၎။ ကြောင်ပိန်ပိန်လေး(သူစားမကုန်တာကျွေးဖို့)
၅။ တိတ်ဆိတ်မှုနဲ့ အနွေးဓာတ်
၆။ မြင်းရိုင်းတစ်ကောင် (စိတ်ကူးထဲမှာ စီးကြည့်ဖို့)။ ။

နေမျိုး
၂၄-၅-၀၅

အဖေ့ဒိုင်ယာရီ

အဖေ့ဒိုင်ယာရီထဲမှာ
ကမ္ဘာတစ်ခု
အဲဒီကမ္ဘာထဲမှာ
ကျွန်တော်ဟာ
အမြဲတမ်းကလေးငယ်တစ်ယောက်ပါ
ပြေးဆော့နေတယ်။ ။

နေမျိုး
၎-၃-၀၅

လူ့ဘ၀ရဲ့အရသာ

မီးဖိုခန်းမှောင်မှောင်ထဲမှာ
အဘွားအိုတစ်ယောက်
နို့ဆီဘူးခွံကို
ရေကျင်းပြီးသောက်နေရဲ့။ ။

နေမျိုး
၎-၃-၀၅

ဖောက်မလင်ရည်စိမ်ထားတဲ့လူကလေးသို့

လူကလေး
မင်းကိုငါမေးမယ်
အပြစ်ကင်းသူအဖြစ်
မင်းမွေးဖွားလာခဲ့တယ်
ဒါကိုသိပါစကွယ်။ ။

နေမျိုး

ဒုတိယအကြိမ် ဖတ်ရှုရန် မလိုအပ်တဲ့ကဗျာ

ကျွန်တော် မယုံတာ (၃)ခုရှိတယ်။
၁။ ကျွန်တော်။ (၂)ခင်ဗျား၊ (၃) အခြားတစ်ယောက်
ကျွန်တော် ယုံတာ(၃)ခုရှိတယ်။
(၁) ကျွန်တော်၊ ၂။ ခင်ဗျား၊ (၃) အခြားတစ်ယောက်။ ။

နေမျိုး
၁၆-၁၁-၀၅
ည ၁၁ နာရီ

ဂြိုဟ်သား

တားမြစ်ထားတဲ့သစ်သီးကို စားမိတယ်
တားမြစ်ထားတဲ့ ရုပ်ရှင်ကို ကြည့်မိတယ်
တားမြစ်ထားတဲ့ အိပ်ရာမှာ အိပ်မိတယ်
တားမြစ်ထားတဲ့ အိပ်မက်တွေတစ်ညလုံး မက်ခဲ့
နိုးလာတဲ့အခါ
ကိုယ်ဟာ တခြားကမ္ဘာက ဂြိုဟ်သားတစ်ယောက်ဖြစ်ခဲ့ပေါ့။ ။

နေမျိုး
၂-၃-၀၄

ငါ

စွန့်ပစ်ခဲ့ကြပြီ
ပိုးလောက်တဖွားဖွား
ဝမ်းဗိုက်ကြီးရောင်ကိုင်းဖောင်းကားလို့
အပုပ်နဲ့တထောင်းထောင်း
ဘင်္ဂအရည်တွေယိုစီးကာစိမ့်စိမ့်
ငါဟာခွေးသေကောင်ပုပ်ပါ
ခွေးသေကောင်ပုပ်ဟာ ငါပါ
လင်းတတွေသာ ငါ့ကို အရသာခံတတ်ကြပေလိမ့်
တောမှီရဟန်းတွေသာ ငါ့ခန္ဓာကို
ဓမ္မဥာဏ်ပွင့်အောင် ရှုနိုင်စွမ်းပေလိမ့်။

နေမျိုး
၂၁-၂-၀၃

အိမ်ရှေ့က သစ်ပင်

ချိန်းဆိုထားပြီး ရောက်မလာသူတစ်ယောက်ကို
စောင့်ဆိုင်းနေသလို ရပ်လို့ ပေါက်ရောက်နေတဲ့ သစ်ပင်တစ်ပင်
ငါ့အိမ်ရှေ့တွင်။
သစ်ပင်အောက်မှာ တစ်ခါတလေ ကောင်လေးတစ်ယောက်
တစ်ခါတလေ အဘွားအိုတစ်ယောက်
တစ်ခါတလေ ခွေးကလေးတစ်ကောင်
ရပ်လို့။ လမ်းမကို ငေးလို့။ ။

နေမျိုး
၂၉-၁၁-၀၅
ည ၈း၀၅ နာရီ

စက္ကူ

ကျွန်တော် ညအခါ အိပ်ရာထဲလဲလျောင်းလိုက်ရာ
အိပ်မက်တလိမ့်တုံးကြီးက တဒီးဒီးကြိတ်လေတော့တာ
အဲဒီအခါ ကျွန်တော်ဟာ စက္ကူတစ်ရွက်ဖြစ်လို့သွား
လေလွင့်စက္ကူရွက်ပေါ် မင်းနာမည်ရေးလိုက်ပါလား။ ။

နေမျိုး
၂၉-၁၁-၀၅
ည ၉း၂၀ နာရီ

အိပ်ပျော်နေတဲ့ ခဲတံ

ခဲတံ ခဲတံ မင်းဘာကြောင့် အိပ်နေတာလဲ

ခဲတံ ခဲတံ မင်းဇာတိဟာ ဘယ်ကလဲ

ခဲတံခဲတံ အခုမင်းအိပ်မက်မက်နေတာလား

ခဲတံခဲတံ အိပ်ရာကနိုးလာတဲ့အခါ

အားလုံးကိုပြန်ရေးပြပါ

ငါသိချင်နေမိတာ။ ။

နေမျိုး

၂၉-၁၁-၀၅

ည ၉း၀၅ နာရီ